ਮੱਧ ਪ੍ਰਦੇਸ਼ 'ਚ ਦਿਨ-ਦਿਹਾੜੇ ਵੱਡੀ ਬੈਂਕ ਲੁੱਟ: 14.8 ਕਿਲੋ ਸੋਨਾ ਤੇ 5 ਲੱਖ ਰੁਪਏ ਨਕਦੀ ਲੁੱਟ ਕੇ ਲੁਟੇਰੇ ਫਰਾਰ

ਮੱਧ ਪ੍ਰਦੇਸ਼ ਦੇ ਜਬਲਪੁਰ ਜ਼ਿਲ੍ਹੇ ਦੇ ਖਿਤੌਲੀ ਖੇਤਰ ਵਿੱਚ ਮੰਗਲਵਾਰ ਸਵੇਰੇ ਇਕ ਹੈਰਾਨੀਜਨਕ ਡਕੈਤੀ ਵਾਪਰੀ। ਚਾਰ ਲੁਟੇਰੇ, ਹੈਲਮੇਟ ਪਹਿਨੇ ਹੋਏ, ਦੋ ਮੋਟਰਸਾਈਕਲਾਂ 'ਤੇ ਸਵਾਰ ਹੋ ਕੇ ਈਐਸਏਐਫ ਸਮਾਲ ਫਾਈਨੈਂਸ ਬੈਂਕ ਦੀ ਸ਼ਾਖਾ ਵਿੱਚ ਦਾਖਲ ਹੋਏ। ਸਿਰਫ਼ 18 ਮਿੰਟਾਂ ਦੇ ਅੰਦਰ, ਉਹ 14.8 ਕਿਲੋ ਸੋਨਾ (ਲਗਭਗ 14 ਕਰੋੜ ਰੁਪਏ ਮੁੱਲ) ਅਤੇ 5 ਲੱਖ ਰੁਪਏ ਨਕਦ ਲੁੱਟ ਕੇ ਭੱਜ ਗਏ।

ਪੁਲਿਸ ਮੁਤਾਬਕ, ਘਟਨਾ ਸਮੇਂ ਬੈਂਕ ਵਿੱਚ ਕੋਈ ਸੁਰੱਖਿਆ ਗਾਰਡ ਮੌਜੂਦ ਨਹੀਂ ਸੀ ਅਤੇ ਸਿਰਫ਼ ਛੇ ਕਰਮਚਾਰੀ ਸਨ। ਲੁਟੇਰੇ ਸਵੇਰੇ 8:50 ਵਜੇ ਅੰਦਰ ਆਏ ਅਤੇ 9:08 ਵਜੇ ਤੱਕ ਫਰਾਰ ਹੋ ਗਏ। ਸੀਸੀਟੀਵੀ ਵਿੱਚ ਇੱਕ ਲੁਟੇਰੇ ਦੀ ਪੇਟੀ ਹੇਠ ਬੰਦੂਕ ਲਟਕਦੀ ਦਿੱਖੀ, ਪਰ ਹਥਿਆਰਾਂ ਦਾ ਖੁੱਲ੍ਹਾ ਪ੍ਰਯੋਗ ਨਹੀਂ ਕੀਤਾ ਗਿਆ।

ਹੈਰਾਨੀ ਦੀ ਗੱਲ ਇਹ ਹੈ ਕਿ ਬੈਂਕ ਅਧਿਕਾਰੀਆਂ ਨੇ ਘਟਨਾ ਤੋਂ ਲਗਭਗ 45 ਮਿੰਟ ਬਾਅਦ ਹੀ ਪੁਲਿਸ ਨੂੰ ਸੂਚਿਤ ਕੀਤਾ। ਐਡੀਸ਼ਨਲ ਐਸਪੀ ਸੂਰਿਆਕਾਂਤ ਸ਼ਰਮਾ ਦਾ ਕਹਿਣਾ ਹੈ ਕਿ ਜੇ ਸਮੇਂ ਸਿਰ ਜਾਣਕਾਰੀ ਮਿਲਦੀ, ਤਾਂ ਦੋਸ਼ੀਆਂ ਨੂੰ ਕਾਬੂ ਕੀਤਾ ਜਾ ਸਕਦਾ ਸੀ। ਬੈਂਕ ਆਮ ਤੌਰ 'ਤੇ 10:30 ਵਜੇ ਖੁਲ੍ਹਦਾ ਹੈ, ਪਰ ਤਿਉਹਾਰ ਕਾਰਨ ਉਸ ਦਿਨ ਸਵੇਰੇ 8 ਵਜੇ ਹੀ ਸ਼ਾਖਾ ਖੋਲ੍ਹੀ ਗਈ ਸੀ।